LA MALDICIÓN DEL MAESTRO, 2AB

Con este grupo, viaxamos ao fascinante mundo de La maldición del Maestro, a segunda entrega da saga Crónicas de la Torre, escrita por Laura Gallego.

Dana, a nosa protagonista, terá que enfrontarse a novos perigos e descubrir que o pasado pode agochar misterios capaces de cambiar o presente. A maxia, a amizade, a lealdade e a loita contra o mal mestúranse nesta aventura chea de emoción e fantasía.

Abrimos as páxinas dunha historia chea de maxia, misterio e perigos. Unha lectura para deixarnos levar pola imaxinación, descubrir segredos e compartir teorías.

UN DE NÓS MENTE, 3A

 

A nosa primeira lectura estará chea de misterio, sospeitas e xiros inesperados: Un de nós mente, de Karen M. McManus.

Cinco estudantes entran nunha aula. Só catro saen con vida. Todos teñen algo que ocultar e todos poderían ter un motivo para mentir. Pero, quen di a verdade? E quen está disposto a facer calquera cousa para que o seu segredo non se descubra?

Preparade as vosas hipóteses, escollede o voso sospeitoso e deixádevos levar pola historia. Porque, nesta lectura, unha cousa está clara: calquera pode mentir, pero alguén terá que descubrir a verdade.

Sabiades que tamén ten unha adaptación televisiva? A serie Alguien está mintiendo, para Netflix. E ti, que prefires: ler primeiro o libro ou ver antes a serie?

PEL DE LOBO, 3B

Iniciamos  este club de lectura con Pel de lobo, de Xosé Miranda, unha novela que mestura misterio, lendas e tradición galega.

A historia mergúllanos nun universo de intriga no que o lobo, os medos e as crenzas populares teñen un papel fundamental. A través dunha atmosfera chea de misterio, a obra achéganos ao imaxinario tradicional galego.

Ficha de lectura.

BONE, 2BC

Comezamos cun antigo éxito nos clubs de lectura: Bone 1, Lejos de Boneville, de Jeff Smith. Elixida pola revista Time como unha das 10 mellores novelas gráficas de todos os tempos.

A historia de tres primos -Fone Bone, Phoney e Smiley- expulsados de Boneville e perdidos nun enorme e descoñecido deserto. Tras diversos incidentes reuniranse na cidade de Barrel Haven alleos á conspiración que se tece en torno a eles e sen percatarse de que as súas aventuras só acaban de comezar.

Como aperitivo, analizade nesta viñeta con que velocidade lles chega o inverno. Sorprenderanos a nós igual?

EUROPA EXPRESS, 4ºA

Europa Express, da escritora coruñesa Andrea Maceiras, é unha novela que plantexa unha viaxe de interrail que sete mozos fan ao remataren o segundo curso de bacharelato. A traxedia sufrida por un deles, Xacobe,  e as dúbidas sobre a súa morte latexan no máis íntimo das personaxes dez anos despois, especialmente nos casos da parella formada por  Nico e Aroa. Novela de perfil psicolóxico, cunha estrutura orixinal artellada con dificultade, que amosa certos coñecementos sobre o vello continente, non exenta de tópicos e cun final sorpresivo aínda que algo confuso.

Ficha de lectura.

DIARIO DE GREG 10, 1AB

Comezamos coa décima aventura de Greg, na que se enfronta a unha situación moi diferente: intentar vivir durante un tempo como se fose “á vella escola”, é dicir, sen tanta tecnoloxía nin comodidades modernas.

Seriamos capaces de pasar unha semana enteira sen móbil, videoxogos ou internet?

Estes vídeos poden ser un punto de partida interesante para entender o estilo: moito humor, situacións incómodas e aventuras na vida diaria dun rapaz que intenta sobrevivir á escola e á familia.

 

DIARIO DE GREG, 1AC

Xa temos unha nova aventura entre mans! Escollemos Diario de Greg 1: Un pringao total, de Jeff Kinney, un libro que nos achega ao mundo de Greg Heffley, un rapaz que intenta sobrevivir ao día a día no instituto, ás amizades, á familia e a todas esas situacións tan divertidas como complicadas que forman parte de medrar.

A través das súas anotacións e ilustracións, descubriremos unha historia chea de humor, ocorrencias e momentos cos que seguro que máis dunha persoa se sentirá identificada.

Guía de lectura

Proxecto didáctico sobre o humor na aula