Hai veces na vida dalgunhas persoas en que de súpeto ocorre algo que o cambia todo. O medo. Medo a vivir. Medo a non soportar a vida. Medo a ter que facelo. Medo a non saber como. Medo ao medo.
Tamén trata dos celos. Os celos destrúennos por dentro. A miúdo, tamén por fóra. Os celos destrúeno todo. E sempre pagamos por eles un prezo demasiado alto. Como Eric, como Xenia, como Hugo. Porque aprender a vivir nunca é fácil.
O narrador desta historia, un home adulto, regresa á vila na que transcorreu a súa infancia, asociada na súa memoria a unha traumática experiencia vivida daquela. Decidido a saldar dunha vez por todas as contas co pasado, relata o que lle aconteceu tras quedar pechado no enigmático caseto que espertaba os temores da cativada de Valverde. Para volver reunirse cos seus e abandonar ese lugar de encerro, o protagonista terá que superar as probas do cruel Señor das Serpes e lograr regresar con vida da Illa da Lúa.
Un relato que nos interna nunha aventura marcada polo medo e unha tensión que se intensifica consonte van avanzando as páxinas.
Nesta interesante selección reúnense algúns dos mellores contos de terror escritos polos grandes mestres do relato fantástico: Poe, W.W. Jacobs, H. P. Lovecraft, Horacio Quiroga... Un medo que xorde con sutís pinceladas e non con sanguentas descricións.
Despois de ler as dúas primeiras entregas da triloxía (Mentira e Verdade), fixemos un pequeno concurso no que as alumnas e alumnos do grupo de Club de Lectura de 3ºA e B tiñan que pensar un final para esta historia.
Unha novela de terror na que o realismo da ambientación convive coa presenza do sobrenatural e o inexplicable. Jeremy ten un mal soño que volve unha e outra vez, un horrible pesadelo que está a indicarlle algo. A súa nai morreu en circunstancias estrañas, ao igual que varios amigos do seu pai. ¿Que foi o que ocorreu? ¿Cal é o significado dos seus atroces pesadelos? ¿Quen é ese ser sen rostro que o aborda pola rúa e lle fala do seu pasado? Jeremy vai emprender unha investigación que rematará converténdose nunha dolorosa viaxe cara ao medo.
Na seguinte lectura, Temblorde Maggie Stiefvater, os membros do Club de lectura de 3º C tremerán. Será de medo ou de amor? Grace, unha moza moi práctica e independente, coñece a un mozo, Sam, que esperta nela familiaridade, pero tamén inquietude. Poderán superar os obstáculos que existen nas súas vidas?
Dada a situación excepcional que estamos a vivir estos días, animámosvos a rematar durante este tempo a lectura do libro VERDADE (Club de lectura de 3ºC) e do libro MEDO (Club de lectura de 3ºA e 3ºB).
Á volta comentarémolos!
E lembrade, non estamos de vacacións, esto é unha alerta sanitaria. Quedade na casa!
A novela deMargaret Atwood foi a elixida para a reunión do 3 de novembro.
Amparándose no medo ao terrorismo islámico, os gobernantes deciden suprimir a liberdade de prensa e os dereitos das mulleres. Neste contexto, na República de Gilead, Offred só serve para procrear, tal como impoñen as férreas normas establecidas pola ditadura que domina o país. Se Defred se rebelase ou non fose capaz de concibir, só lle esperaría a morte en execución pública ou o desterro.
A vida das mulleres está controlada ata o mínimo: alimentación, indumentaria, actividades... todo, agás o pensamento e o desexo que resulta incontrolable.
Esta novela leva trinta anos nas librerías con escaso éxito Será agora a serie que nela se inspira o auténtico trampolín para a lectura?
Eva Mejuto, en Memoria do silencio, noveliza a historia real das irmás Touza, que durante os primeiros anos 40 salvaron a máis de 500 xudeus perseguidos polo nazismo.
Estación de tren de Ribadavia, verán de 1943. Günter busca ascender na Gestapo destapando unha trama internacional que axuda os xudeus a chegar a Portugal e abandonar Europa. Lola é unha muller brava e xenerosa, que cre na xustiza por riba de todo e arrisca a vida por axudar a quen o necesita. Frieda foxe da Holanda nazi e do seu pasado, arelando empezar unha nova vida en América como directora de orquestra. Tempos difíciles onde o medo e o silencio tecen unha rede de segredos e intrigas cun fin último: a liberdade.
Lemos agora catro relatos de misterio que Docampo dedica aos seu pais, dos que di que foron grandes contadores de contos. Son historias que cando as lemos, parece que as estamos escoitando, o cal fai que o noso medo vaia en aumento e ademais poden facer lembrarnos os nosos medos que criamos especiais: aquela carballeira chea de sombras, o vento que abanea os salgueiros, a neve que nos chamaba a andar e ía borrando as nosas pisadas co risco de perdernos, a brétema que non nos deixa enxergar que seres se ocultan.
"Nunha ocasión, hai xa ben de tempo, vin unha pantasma. E logo, catro anos despois, vin outra. A primeira pantasma era amable, mesmo arrecendía que daba gusto. A nardos. Era o espírito de Beatriz Obregón; grazas a ela atopei as Lágrimas de Shiva, un fabuloso colar que estivo perdido durante setenta anos.
A segunda pantasma foi moito menos amable. Metía medo e, desde logo, non arrecendía precisamente a nardos. Tiven un desagradable encontro con ela na Mansión Kraken, pouco despois de escoitar falar por primeira vez do Círculo Escarlata, unha escura e sinistra seita tan antiga coma o tempo. Iso ocorreu no verán de 1973, catro anos despois da miña estancia en Vila Candeloria, o fogar dos meus tíos e das miñas curmás, os Obregón."
Despediremos o club coa lectura desta novidade editorial, premio National Indie Excellence para a mellor novela de suspense de 2015.
Lisa ten 16 anos, antecedentes académicos intachables, habilidades para a ciencia e unha intelixencia que supera á media. Con todo, hai outra característica da súa personalidade que a converte nunha moza diferente ás demais: padece un transtorno que lle impide empatizar coa súa contorna. Por iso, cando é secuestrada con sete meses de embarazo, Lisa non sente medo ou desesperación, senón que se enfoca na construción dun plan perfecto que lle permita destruír ao seu carceleiro.
Temos tan boas referencias, que decidimos comezar co primeiro da triloxía de Care Santos.
Xenia loita por sacar as mellores notas, pero ultimamente o seu rendemento académico está baixando. O que ocorre é que Xenia se namorou, pero non dun rapaz do seu redor, senón dunha pantasma, dunha voz que xorde da Internet e coa que comparte a súa paixón pola lectura.
Como o seu amor virtual non quere concertar unha cita, decide localizalo e presentarse ante el por sorpresa. Investigando, descobre que todo é mentira: nin a foto nin o nome do rapaz son reais. Cal é a verdadeira identidade da súa alma xemelga?
"Son Álex, un mozo transexual. Abro este vlog para compartir con vós a miña vida. Quen me coñeza e estea a ver este vídeo entenderá moitas cousas, ou mesmo non comprenderá -ou non quererá comprender- nada. O distinto asusta, dá vertixe porque obriga a cuestionarse tantas cousas... E por iso fago este vídeo, porque non quero ter máis medo, nin vergoña de ser quen son."Antes de que lle dese tempo a pensar, conectou a cámara co ordenador. Vinte e dous segundos. Ese foi o tempo que tardou o arquivo en subir á rede. "22 segundos"
